Hawar Tornêcengi
WELAT RA TAYÊ KURATEY
-1-
Kirıg de mordemê bi, cı ra Uşênê Dursıni vatene. Bıraê de xo ki bi, namê
eyi ki Dursın bi.
Uşênê Dursıni rozê bıraê xo ra qarino, zawt dano pıro, vano; "Ero Bıra,
dilêgê mı ke Jêle ra esto, roê to qatıra şiae kero, Heyderu dest do!".
Çıke Heyderu qatıru zaf gurenenê coka, hên zawt dano bıraê xo ro.
-2-
Ju ware de dela de dızde bena. Niajniya kokıme sıt amên kena, yêna
verê çêveri de, ae ´ve cênu ra têlewe de nisenê ro qesey kenê. Qesey
kenê, jue cıra xafılde gınena pıro, vana ke; " Niajni-niajni dele hawa
kute warê to!" Niajniya kokıme xeleşina ra sona ke; dele serê qusxanê
sıti ra qapağ esto, hawo fek fişto cı çalp-çulp wena. Niajniye vozzêna
sona qusxani sero dele pêcêna, fekê dele rınd proznêna ro zerê qusxani,
vana; " so so, ciyê mı yê to bo!, bara to ke mı ra nêamê, bara mı to ra
nêşiye!". Cêni ke na qesi hesnenê, huyais gıneno pıro qırr benê.
-3-
Mesela Usê Seme u Asıqe
Amnon bi. Tevera tiji sanayvi cı, her ca kerdvi jê bijêrıku. Usê Seme
vaşturiye ra ame, cêniya xo vake:
"Uşê! mı hao dere de adır kerdo we, xorê son rovar kon, hala kıncunê xo
veze, beri tey bışüyi!"
Yê Uşêni kıncê xo honde jêde çinebi ke bıvurno, ju qat pıren-tumanê
xo bi. Têde veti, dayi 'ra ve cêniya xo dest; a tekıte şiye fekê deri,
rovari ser. Ey ki xo est bınê cıle, çı ke rut-rupal vi. Çêverê xo
phoştser rakerde vi. Cêniya xo ki deri verde rovar kerdêne. Xafılde dı
cêniyê Asıqu çêverde vêjiyay ke xorê pars arê kerê. İne niada ke
mord'mek hao cıle dero, bınê cıle ra qe nêvejino. Asıqa juye vake:
"Ağa, urze tenê ardu, ya ki hevê ron ma de, ma xorê raa xoro şêrime!"
Uşêni vake:
"Ule khavaniya çêyi çê de çina!"
Kerd nêkerd asıqi çêver ra düri nêkoti. Pêyniye de jüye şiye, asıqa
bine nêşiye - peyser mende. Ae va:
"Hata ke parsê mı medê, ez ita ra game nêson!"
Uşêni, seytanêni amê ve aqıl, vake:
"Hala bê defê cıla mı kuye, dıma halê keme."
Asıqe:
"Nê, tove bo ke nêbeno! Jü qına mı esta, ez pê dae hona des dewu
fetêliun, eke ke rae ra her keşi dine, halê mı se beno?" Vake u tekıte
şiye.
Eve na tore, hem Asıqe parsê xora texeliye, hem ki Uşên Asıqe dest
xeleşiya ra.
Coka vanê: "Asıqe her kêşi rê vana 'Ağa', hama ağaê xuyo rast çê dero".
___________________________
-4-
VÊSANİYE
Pılemoriye ra mordemê (name nêkon) sono suka Erzıngani. Çarşi de ke
tenê fetelino, beno vêsan. Mêrat qurısê perey ki cêv de çinebeno.
Nêzoneno ke se bıkero.
Naskerdoğê ki rast nino ke bero meymaniye...
Bado vêsaniye ke dana ve pize; aqıl hona yeno sare, çêverê loqanta de
kuno zere.
Garson yeno lewe, cırê xızmet u hazete keno. Mêrık werden u sımıtene
deyra dano ardene. Weno, sımeno. Pizê xo ke keno mırd, xatırê xo wazeno
ke şêro, garson kuno vıreniye, vano:
"To perê werden u sımıtene xovira kerdi! Yemeg peresi, apo yemeg!"
Mêrık cêreno’ra cı:
"Çık peresi oğlum! Roz des meyman yenê çê mı, wenê sımenê, sonê.
Coru mı kêşi ra qurısê perey waşti ke, ez ki bıdine to!" vano, çêver de
beno tever.
Garson dıme ra motamot maneno….
-----------
