NEQEBÉ VERGAN
ilhami sertkaya
NEQEBÉ VERGAN
Namê ju filıme tırkiyo 'neqebê vergan'....
Şıma şıkine a ca de bıvêne ke o neqeb welatê ma, vergi ki ê be xoyê...
A ca de goni, qılêri u qefçıliya vergan, serê sênê ma de, dırhem dırhem rışino..
A ca de, hukmê vergan, bandora serran, belengazi u bındestiya ma...
'Rambo' u 'Kovbo'yê tırkan, zılmo bê sindor, zalımo bêbext.....
U halê ma....
'Neqebê Vergan', serê qırkerdena şarê ma de, o idelojiyo ke ebe deq u dolaban
pır o, namê xo 'kemalizm' o, a ca de vecinê.
A roje ra nata, ma zaf 'neqebê vergan' di...
Seba na xederiye,verba nê zalıman u zılman, kewtime rayan, veciyayime koyan, na
'kılama sure' zaf derg a....
Ma çı di, çı nê di...
Ma se kewtime bınê bandora nê vergan? Verba nê vergan zaf sare berz kerdime, zaf
dayime pêro, ancina ki nêkewtime ser, sebep çıko? Bedelo ke ma da, bedelê 'nê
bedeli' no halê mayê ewroyi bi?
Şaşiyê de gırse, xeletiyê de xori esto mêydan de.Na xeletiye u şaşiye heni zelal
o ke....
Sebebo ke ma veciyayime koyan u rayanê duriyan: Kamiya ma, zonê ma, edebiayt u
kulturê ma nê bi?
Şıma kê de zonê xo qesi kenê ya zonê 'neqebê vergan', yanê tırki?
Ma domanê şıma?
Ya ki şıma seba ke zonê xo nêzanenê, qesi nêkenê, manê şıma çıko?
Ya ki kam zonê ma, rojê serê 'xonçê zernıni de' ma ra kerem keno dano ma?
No xiyal o, kes xo mexapno.Vayirê nê zoni mayi me, 'a roje' nêna, eke ma be xo
miyame...
No zelal u rast niyo? Çiyo ke ma naye de fam nêkenime çıko?
Sebebê na vıla biyene u ciya mendena ma çıka? Ma kami 'çı werd ke ju bin tepya
mend'?
Çıkê ma esto ke, ma seba xatırê ideolojiyan u partiyan xatırê jumıni mezanıme?
Ma tayê kesê ke hina bınê tesirê kemalizmi de, ma ra şanıkan vanê nê 'şermokan'
ra cavıme çı?
Nê şermoki qalê kemalizmi nêkenê, êy ra bı hurmet vındenê, ma ra heqaret kenê, 'kıbar
kıbar'!
Tew... tew ke tew....
Xılamalê dınyayê....
Hal ke no hal bo,'genduguyê' şari qey serê ma de ebe filımê 'neqebê vergan' kay
mekero?
Mı va 'neqebê vergan'..
Hata ke ma wayirê kamiya xo, zon u kulturê mevecime, hata ke nê şermokê 'ma'! bı
bê, hata ke nê zonê asimilasyoni, nê zonê tırki fek u ruhê xo de mevecıme, hata
ke ma zonê xo mezanıme, qesi mekıme, ma hina zaf 'Neqebê vergan' vênenime...
Mevacê 'neqebê vergan ser u bınê xo ju filım o'..
O filım, jariye u trajediyê ma yê neway serre wo....
İlhami Sertkaya
25-9-2007
ÇIME
http://members.lycos.nl/ilhamisertkaya/index.html
