‚Ondera Kırmanciye’

Ali Erenler

Waxte Kırmanciye de hete ra adet u tore aşiru,
Heto bini ra ki yiqrar u itikate piru, talıvu biye
Aşiru de qese ağau qerar bi, piru eve yiqrari qese bırnene

Çeneki ke remay şi, verende pilune aşiru amene peser
Qolınd nene pa, vıstewrey ardene hure, veyve re qese bırnene
Qese aşiru ke bes niyame, venge yiqrar u piru dene

Waxte Kırmanciye de aşiru waire dew u warey bi, ağaeni kerdene
serwa ju bıze nene ra jubini, dısmeneni kerdene, tıfong erzene
veng dene pir u rayveri re, eve qese yiqrari dısmeneni qedenene,

domanu eve toraqi, sanıku ve velıku kerdene ra pil,
pirıku ara de hewne xo ser qeseykerdene, loqme kerdene ra vıla
radon çine bi, qazanta çine biye, mılet dewe be dewe qese fetelnene

Waxte Kırmanciye waxte kewraeni bi, waxte mısayiveni, waxte berviye,
mektevi çine bi, kıtavi çine bi, kes zone xo ra mektuve nenusnene
merdene Eskerune Avdıl Mısay ra zonene, mendene haq u jiaru ra

Thengiye de Xızıri re veng dene, Duzgıni re, çiye newe çerçi ra guretene
ilım qese khalık u pirıku bi, thame tar u turi, keramete Dewresu
Hesa u raştiye Ceme Xızıri de biyene ra vıla, keşi çhepçieni nezonene.

Hirıs u Heşti ra ver ilıme ma ilıme Kırmanciye bi, yiqrare ma yiqrare Kırmanciye,
ma yiqrare Kırmanciye kerdo vindi, dar u jiare Harde Dewresu bekese
hirıs u heşti ra thepia fame ma fame çerçiyono, roe ma roe dırvetın

‚Ondera Kırmanciye’, waxt waxte vıren niyo, fama fame vıren niyo,
Name to biyo vindi, venge Sılo Qıci ra ber kes to nasnekeno,
Roe aşiru qese fetelnene ra neweso, roe pir u rayberi domanune tora herediyo
‚ Ondera Kırmanciye’ waxt waxte vıren niyo,kam to re wayır bıveciyo.

Ali Erenler