NAYE ROZÊ MISENÊ
Torné TUJI
Khalıkuné ho ne zoné, ne naskené
Ewro çıqa khe raste né wazené
Azé dine meste naye mısené
Tersuné ho ver roşti ra remené
Heqa ma de çı ferman u qeraro
Yé wayiriyé maré çıke zeraro
Naye nézome, dame ho sarero
Ma hona hawur nime na duvararo
Çıturi mordem erjino dısmeni vırare
Dısmené bé çéveri ra keno tivare
Famkoru ra coru duri né kona pıxare
Sarr poştiya dinera zengin, yé fıqare
Gere bızoniyo dısmen derdé cınao
Né verda; sunık, senat u zoné mao
Awxa, kemer u dar u ber u hewao
Ne asméno khewe, ne hardo şiao
Ma yé khe khalık u bavık naskeme
Hardé pi u khaliki sero maneme
Zoné mae u dakıla ho zoneme
Vera ho xapıtena dine vındeme
Coka çond séy sera ma qırkené
Roşti ré dısmen, rınde ra remené
Jure dıma ré, raste ra tersené
Sekeré eve naye né manené
Ewro yé khalıkuné ho né zonené
Tersa ho esta, kesi tivar né kené
Nıka çıqa khe raste né wazené
Azé dinu nayé rozé mısené
Torné Tuji naye ve ho rınd zono
Jüyo khe çéveré sari de candano
Sunuk u senata ho ré poşti né dano
Kes coru cıré xéra heqi né vano
Torné Tuji
08.08.2007
