EZ KARÉR DE KEWTA RAYE

 ilhami sertkaya

Porê mı, ebe tija Karêri şane bi....
Destê mı de, rêça vaşturiya Karêri hina yasen o....
Mı sarê xo, dolıma verêne, neqebe u verojê Karêri de na ro, awe şımıt..
Waranê Karêri de dolıma verêne berba, huya, ebe kemeran kay kerd, rema, hes kerd..
Mı a ca de dolıma verêne usar di, amnan, payiz, zımıstan, serd, germ, şıliye a ca de...
Şewqet, meramet, mordemiye, manquliye, cirantiye, hastiye a ca de...
Çımê mı, dolıma verêne, Karêr de roştiye di..
Lêlê sodıri, peroj, muxurbe, şewe, tari, asme a ca de...
Mı Karêr de sarê xo vırda bi nermiya vırara maya xo, germiya hermanê pirıka xo...
Baya şıti, miraz u amênê non u weri, kıla adırı, dolıma verêne mı Karêr de di...
Hêlina domantiya mı, mezgê ruhê mı, mırdiya mı, vêşan u têşaniya mı Karêr...
Ez Karêr de kewta raye...
Koyan, sindoran, şukan, welatan, çeman, adıran, pırdan, şewan, derbaz biya, zaf dolımi ebe zere vêşan, bı çimê bê hewn, verê keweran de vêrda ra..
Bê veng, bı xof u ters...
Tersê mı merdena ra nêbi, mıxenetiye ra bi...
Xora rubalê qefçıl u qılêriya inkar u zurekerê tırki de, ez Karêr de kewta raye...
Kata şiya mı Karêr xo de berd, kata şiya zerê mı de Karêr...
Şıma zanenê Karêr çıko?
O çiyo ke zerê şıma, bı şên u şênatiya xo lerznen o, çiyo ke şıma wazenê bıheşênê, bıvêne, O Karêr o..
Yanê vengê mızgine, rengê gulsosıne...
Coka ke Karêrê her kesi esto....
Hama her kes karêrê xo de nêvısiyo..
Ma vısiyayi me, ez vısiya Karêrê xo de...
Coka ke ez Karêr de me bi, Karêr zerê mı de ro...
Waxto ke ez Karêr de kewta raye, o roje ra nata, endi Karêr zerê mı de ro..
Ma xemê kamiyo ke? Kami ra çı Karêr zerê mı de ro?
Domanê welatê ma, bı hazaran 'karêrê xo de' kewtê raye,vısiyê...
Qar u qotıkê na dınya, niya ro.
Şiyene, rayi, duritiye, hesrete kewta para ma..
Ma inan ancenime seba 'Karêrê xo', mısayime, na merdene niya...
Hama şıma zanenê merdena xoriye u bêbın çıko?
Waxto ke ma kamiya xo vindi kerd, a waxt endi zerê ma de Karêrê ma qedin o..
Ez Karêr de kewta raye, Karêr de vısiya, hama mı karêrê xo vindi nêkerd....
Şıma zenenê tayê kesi 'Karêrê xo de' bı bê ki, Karêrê xo vindi kerd ê...
Karêr welat o, kamiya, zon o...
Kam ke inan vindi kerd, welat de bı bo ki, endi qediyo...
Ez zen kena pepuge ma ra nê, inan ra wanena...
Şala tı kesi ra mewanê Pepug
Vengê awa çemê Muzuri de, tayê vengê pepuge esta.Vengê vayê Çewlıgi de, sodırê Karêri de tayê pepuge wanena...
Şıma ke zon u kamiya xo kerd ê vindi, şıma ke mı nêheşênenê, fam nêkenê, pepuge şıma ra wanena..
Şıma zanenê na pepuge kami kerdo zerê şıma?...
Na xırabiya ke kamiya şıma, ruhê şıma de vısno, zono ke şıma qedêneno, kerdo fekê şıma, o be xo wo...
Yanê na pepuge, biyo zonê tırki, kewto mezg u fekê şıma, a ca de waneno şıma ra...
Kılama pepuge nıka niya wo;
'-Pepo, keko kam şıma roj be roj kışen o?
-Zonê Tırki
-Kam şıma kamiya şıma de vısneno helêneno?
-Tırk u zonê tırki
-Ma ez halê şıma ra mewani, halê kami ra bıwani?
-Nêzanenime
Heya...
Şıma nêzanenê...
Ez seba ke pepuge ma ra, mı ra mewano, KARÉR DE KEWTA RAYE...
Coka ez ke bımıri, qe ke nê bi, pepuge mı ra nêwanen a, rehet a ez...
Rêyna vaci ez:
Şala tı kesi ra mewanê pepug...
WAXTO KE EZ KARÉR DE KEWTA RAYE, ASME NÉMÉ ŞEWE DE, XORTİYA MI VİST SERE DE Bİ, HENİ MEND.
KİLITO KE DAYİ Bİ KAMİYA MI RA, MI ŞIKIT, BÉKAMİYE, KERD BINÉ LINGANÉ XO.
Seba ke ez welatê xo de bêkamiye nêwazena, kewta raye...
Waxto ke ez kewta raye, gılê koyan de bılurê şuyanan şıkiya bi, xezeb dıtêne bêriyi...
A kılama derge de, goni rışiyêne, guli poyiya bi...
Usarê zerê mı de, ju dewrêşo herdis sıpê, a kılame lornêne..
Namê a kılame xo vira mekerê; Kamiye wa...
Na kamiye mexerepnê, zaf beno hêf...
Şıma ke wayirê kamiya xo meveciyê, welat berben o....
Mesuliyetê berbayena welati, zê guna gırse megêrê serê xo..
WAXTO KE EZ KARÉR DE KEWTA RAYE, ARAQÉ MI, QILÉRİYA BÉKAMİYE RIŞNÉNE
Usar u payizi kewt bi têmiyan....
Ama na roje ez...
Seba kamiya xo, hina vist sere de ra, hina asme, nêmê şewe de dardekerde wo..
Verba lêlê sodıri, aspar a ez, 'zerê mı de astori est ê'...
'NIKA MA ASPAR Nİ ME, ASTORİ ZERÉ MA DE RÉ'...

İlhami Sertkaya
7-1-2008

Çıme
www.ilhamisertkaya.com