Sewa Zaza TV rê, Duisburg
de
Memed Karer
Dêrsım ra
Ma ve xêri bıraêne, waêne!
Sıfte sıma rê hardê Dêrsımi ra, hardê pi u khalku ra sılamê ho
rusnon. Ez t’a ra ve uza nêşkiun biêrine cokaro sıma rê na xete
rusnon. Haq sıma ra raji vo, sımaê ke zonê ho ra, qomê ho ra has
kenê, na ruval ra amê têhet projia Zaza TVy sero qesey kenê,
lawıkunê ho vanê. Ez na xevere rê zof biune sa, sabiaene çıka, perri
nişti mına. Delğê mı her waxt zonê ma seroo, gosê mı karê sıma seroo,
van ala seveta zonê ma qe karo de rınd nêbeno, qe xevera de xêre
nêvejina?
Çıturi ke sıma ki zonenê, merdena zu zoni merdena zu qomia. Zu qom,
zu mılet werte ra wedardene rê hire ray estê.
Zu dısmen:
1. eve ordiyê ho, eve ç’ekunê ho kuno hardê zu mıleti, i mıleti qır
keno heni werte ra dano we.
2. zonê i mıleti keno tomete, zuyo ke qesey bıkero ki ceza dano cı,
zonê ho eve zora cı salıx dano eve u tore werte ra dano we.
3. ya ki cêncê zu mıleti kunê bınê teşirê zon u kulturê zovina zu
mıleti, zon u kulturê ho caverdanê, kunê ra zon u kulturê zovina zu
mıleti dıma, zonê ho qesey nêkenê zonê i mıleti qesey kenê, lawıkunê
ho nêvanê lawıkunê i mıleti vanê, heni eve ho deştia ho werte ra
danê we.
Sıma ki zonenê ke, serto corêno vırên mıletê ma sero cerevno. Vatena
zu apê de Demenıji ra gore, vato ke ‘ma jêde qır kerdi na çağılê
bınio mendo, na çağılê bıni endi t’oay rê nêbeno, ey ke qır mekerime
ki beno’. Dıma sertê dıino corên mıletê ma sero cerevno. Yanê
mektevê ho nê ro, domonê ma berdê eve zora zonê ho cı salıx do.
Oncia ki ma vindi nêbime, hama ameyme şindorê vindibiaene. Cêncê ma
ki, çıturi ke sıma ki vinenê, leto zu zon u kulturê ho ra koto düri,
koto ra zonê sari dıma.
Vanê mordemê berdo lıngi gire dê do ve pıro, mordemeki vato ax
p’oştia mı, ax p’oştia mı. Vato yaw ma dame lıngunê ney ro, nu ça
vano ax p’oştia mı, ax p’oştia mı, nu ça nia vano? Cı ra pers kenê,
vano p’oştia mı ke bıviyêne sıma nia mı ro nêdêne. Eke yê ma ki zu
televizonê de ma bıviyêne, p’oştia ma biyêne qaim.
Raştia Haq ano hurê, rozê televizon de zonê ho de xeveru, zonê ho de
lawıku gosdame, zonê ho de filımu şêr keme? Hata roza ewroene ters u
xofê dewlete ma sero viyo. Vanê rozê mordemê gozıriye cınıta, şiyê
gerre kerdo, do ve mekeme vato ney zonê ho de gozıriye cınıta. Oncia
rozê çênekê mali de kemere kuya bıze ra, tersu ra eve Tırki veng
kerdo ro cı, vato ‘keçi keçi sana diyorum buraya gel’; vato ‘ez ke
zonê ma de veng ro cı kerine nêvo ke şêrê maylımi de gerrê mı bıkerê’.
Haq ano hurê oncia peyser some dewunê ho, oncia eve zonê huyo rındek
veng keme ro mali, eve zonê huyo rındek kergu waneme vame ‘Cü, cü cü,
qut, qut, qut!’ qut dame kergu, eve zonê huyo rındek sewunê
zımustoni de, sewunê dergu de sankunê ho oncia vame? Eke televizonê
de ma roniyo, eke zonê ma mektevu kuyo heni inam kon ke ni pêro
oncia jê vırêni benê.
Çıturi ke kamılê ma vanê: ‘Haq sola sevevu rê nêverdo, ma kerdime
bêpage, kerdime bêhêga, kerdime bêmezele ameyme suku de erjiayme
pêser, t’a suku de bime pêrsani. Rozê ke bımırime kes meitê ma ki
wenêdano’.
Çı rınd ke sıma estê, nu ma rê diyağo. Haq t’oa ve dest-paunê sıma,
t’oa ve vengê sıma nêkero, projia sıma qomê ma rê ve xêre vo.
Oncia sılamunê ho sıma rê van, bımanê weşiye de.
Source:
http://www.zazaki.de/
