Cünê Feki
Ali Erenler
Kokımi vanê ‘va ni kou nas keno,
na mirçıke usar u payizi nas kena
bızeke maa xo nas kena, ax lemın, vergi nas nêkena
Qese ‘ke fek ra veciya se beno
Qese ‘ke gos nêresa kam zoneno
Vana vana kês nêhesneno
Fek gurino, ro ‘ke çinebi fam se bıkero
Cünê feki va beno
Vengê fami khêrr hesneno
Kokımi vanê meterse
‚No vengê Eskerunê Avdıl Musayo,
bırr ra yêno
nıka waxtê cünê feki niyo
de raurze, raa xora so
Vengê Çhemê Munzuri rayberê tuyo
